Ари аныҳәа наунагӡа аҭоурых иазынхоит ахақәиҭреи асуверентә ҿиареи, аиашареи ахалахатәҳәаақәҵареи рзы ҳажәлар рзин иасимволны.

1992-1993 шықәсқәа рзы зеиԥш ҟамло афырхаҵареи, ахачҳареи, аидгылареи аарԥшны аԥсуа жәлар Қырҭтәыла бџьаршьҭыхлатәи агрессиа хьаҳәхьачарада иаҿагылеит. Урҭ амш хьанҭақәа раан Нхыҵ-Кавказынтәи, Алада Урыстәыла аҟынтәи хатәгәаԥхарала еибашьуаз ҳашьцәеи аҳәаанырцәтәи аԥсуа диаспора ахаҭарнакцәеи рыжәҩахыр ҳаҵагылан. Аԥсны иахьа иахагылоу аҭынч жәҩан азы зхы иамеигӡакәа иҭахаз афырхацәа иԥшьоу ргәалашәара лаша ҳаҭыр ақәаҳҵоит. Урҭ рфырхаҵара хашҭра ақәым.

Иҳаҩсыз ажәашықәсақәа рыҩныҵҟа Аԥсны Аҳәынҭқарра аполитикатә диктат азуразы аҽазышәарақәеи, акыршықәсатәи аблокадеи, адәныҟатәи амчрақәа Аԥсны аҭахкаара рҽазышәареи ирҿагыланы, ихьыԥшым ҳәынҭқаррак аҳасабала аҟазаара агәра угартә ишьақәнарӷәӷәеит.

Аԥсны Адәныҟатәи аусқәа рминистрра жәларбжьаратәи аимадарақәа ргеографиа арҭбаара иаҿуп, аҩныҵҟатәи аусқәа рыҽрыламгалареи рыпринципқәеи ирықәныҟәо аҳәынҭқаррақәеи иареи ҩ-ганктәи аизыҟазаашьақәа рыбжьарҵоит.

Ари иуадаҩу аамҭазы Аԥсны адәныҟаполитикатә курс афундаменталтә вектор акәны ԥсахрада иаанхоит урыстәылатәи Афедерациеи иареи рыстратегиатә еидгылара ганрацәала арҿиара. Аԥсны аҳәынҭқарратә хьыԥшымра азхаҵаразы аҭоурыхтә ӡбара ҳажәлар рыԥсҭазаараҿы аепоха ҿыц аанартит, аҭынчреи аҭышәынтәалареи рзы узықәгәыӷша ахәдықәҵарақәа алнаршеит.

Аԥсны Адәныҟатәи аусқәа рминистрра ҳџьынџьуаа зегьы ирыдныҳәалоит Аиааиреи Ахьыԥшымреи Рымш аҽны!