Цәыббра 23 2026 шықәсазы Москва имҩаԥысит Аиааира Амши Ахьыԥшымреи ирызкны ауснагӡатә. Уи еиҿнакааит Урыстәыла иҟоу Аԥсны Ацҳаражәҳәарҭа.
Уи рхы аладырхәит Урыстәыла ахада Иусбарҭа ахаҭарнакцәа, Москва аккредитациа змоу адипломатиатә миссиақәа рхадацәеи русзуҩцәеи, Аԥсны Адәныҟатәи аусқәа рминистрра анапынҵа ҷыдақәа змоу ацҳаражәҳәаҩ Вито Гриттани, иара убас аԥсуа диаспореи ауаажәларреи рхаҭарнакцәа.
Адкылара аартуа, Урыстәыла иҟоу Аԥсны ацҳаражәҳәаҩ Алхас Кәыҵниа иазгәеиҭеит, 33 шықәса раԥхьа Аԥсны жәлар Рџьынџьтәылатә еибашьраҿы игаз аиааира ареспублика иҿыцӡоу аҭоурых аҿы иналукааша хҭысны ишыҟалаз, уи асуверенитет ауасхыр шышьҭанаҵаз.
Урыстәыла Адәныҟатәи аусқәа рминистрра ИАР аҳәынҭқаррақәа рымадаразы адепартамент адиректор Михаил Калугин иҳәеит ари аиааира аҭоурыхтә ҵакы шамоу, иазгәаиҭеит иҭахаз афырхацәа рфырхаҵареи аветеранцәа ргәымшәареи атәы.
Аԥсны Адәныҟатәи аусқәа рминистр Олег Барцыц атәыла Аиааира Амши Ахьыԥшымреи ирызкны Москва имҩаԥгаз аныҳәатә дкылараҿы дықәгылеит.
"Ари аиааира ҳажәлар рзы даара зыхәԥса ҳараку иааироуп. Ҳара иаҳгәалашәоит, ҳаҭыр рықәаҳҵоит ҳмилаҭтә ԥхьагыла Владислав Григори-иԥа Арӡынба икәша-мыкәша зҽеидкыланы ҳҳәынҭқарра исуверентәыз, ихьыԥшымыз акурс зыхьчоз Аԥсны ахьчаҩцәа", — ҳәа азгәеиҭеит Барцыц.
Асасцәа рыдкылара ахыркәшамҭаз еиҿкаан акультуратә программа, аԥсуа милаҭтә ашәақәеи амузыкатә рҿиамҭақәеи нагӡан.
