Дамаск аҳаирбаӷәазаҿы аделегациа ирԥылеит Шьамтәылатәи Арабтә Республикаҿы Аԥсны Аҳәынҭқарра аҷыдалкаатә Зинмчы змоу ацҳаражәҳәаҩ Муҳаммад Али, иара убас Шьамтәылатәи Арабтә Республикаҿы иҟоу Аԥсны Аҳәынҭқарра Ацҳаражәҳәарҭа аусзуҩцәа.
Адәныҟатәи Аусқәа рминистр Олег Барцыц напхгара зиҭо аделегациа аилазаараҿы иҟоуп Ааԥсны Аҳәынҭқарра Акультура Аминистр Даур Ақаҩба, Афинансқәа рминистр Саид Гәбаз, Адәныҟатәи аусқәа рминистр ихаҭыԥуаҩ Иракли Ҭыжәба, Ҭырқәтәылатәи Ареспубликаҿы Аԥсны Аҳәынҭқарра азинмчы Змоу ахаҭарнак Ибраҳим Аҩӡба, Адәныҟатәи Аусқәа рминистр ицхырааҩ Дмитри Амҷба, Адәныҟатәи Аусқәа рминистрра Аппарат анапхгаҩы ихаҭыԥуаҩ Алиса Барзаниаԥҳа, Акультура аминистр ицхырааҩ Лана Амҷԥҳа.
Аҭаара аҳәаақәа ирҭагӡаны Аԥсны Аҳәынҭқарра аделегациа 63-тәи Дамастәи жәларбжьаратәи аџьармыкьа аусура иалахәхоит, Шьамтәылатәи Арабтә Республика апрофильтә усбарҭақәа рнапхгаҩцәеи, иара убас аԥсуа-адыга диаспора ахаҭарнакцәеи рԥыларақәа мҩаԥнагоит.
Аҭаараан иазыԥхьагәаҭоуп аҩганктәи аизыҟазаашьақәа рыҿиареи Аԥсны Аҳәынҭқарреи Шьамтәылатәи Арабтә Республикеи рыбжьара наҟ-ааҟтәи азҿлымҳара змоу аусхкқәа рҿы аусеицура арҭбаареи рызҵаарақәа рылацәажәара.
