Ҳаҭыр зқәу Сергеи Виктор-иԥа, ҳаҭыр зқәу ҳколлегацәа, акыр иаԥсоу ҳҩызцәа!

Зегь раԥхьаӡа иргыланы азин сышәҭ ҳделегациа зегьы ахьӡала, хаҭала сара сҟынтә урыстәылатәи аган иҭабуп ҳәа расҳәарц гәаартыла, асасдкылара аарԥшны ҳахьрыдыркылаз азы. Даара ҳманшәаланы ҳҭыԥ аанаҳкылеит, аусура ҳазхиоуп. Даҽазныкгьы иҭабуп ҳәа расҳәар сҭахуп ҳколлегацәеи ҳҩызцәеи зегьы.

Ииашаҵәҟьаны, Адәныҟатәи аусқәа рминистррақәа рыбжьара ҳусеицура иаанарԥшуеит хырхарҭарацәалатәи аусеицуразы ҳаизыҟазаашьақәа рыҩаӡара шыҳараку. Иахьатәи аҭагылазаашьа ахәшьара ауҭозар, иҳәатәуп аԥсны-урыстәылатә еизыҟазаашьақәа абсолиуттә ҭоурыхтә максимум аҩаӡараҿы ишыҟоу. Иахьа ари мҽхакыҭбаалатәи, ахырхарҭарацәа зҵазкуа усеицуроуп, уи еиҳа-еиҳа адинамика аҵаны ишьақәгылоит, имҩаԥысуеит.

Шәара ииашаны иазгәашәҭеит ҳтәылақәа рхадацәа — Аԥсны Аҳәынҭқарра ахада Бадра Зураб-иԥа Гәынбеи Урыстәылатәи Афедерациа ахада Владимир Владимир-иԥа Путини рыбжьара инагӡаны аиԥыларақәа хԥа шымҩаԥысхьоу. Ҩышықәса рыҩныҵҟа иахьа Адәныҟатәи аусқәа рминистрцәа ахԥатәи аиԥылара мҩаԥаагоит. Уи, ҳәарада, зымҽхак ҭбаау, даара хра злоу ҳусеицура аимпульс цҵақәа анаҭоит.

Аԥсни Урыстәылеи ҩ-ганктәи ҳусеицураҿы иахьа идырҿио ахырхарҭақәа зегьы ҳҳәынҭқарреи ҳажәлари рзы акырӡа аҵанакуеит. Зегь раԥхьаӡагьы, ҳәарада, иҳәатәуп аекономикатә еинырра атәы. Даара зымҽхак ҭбаау, акыр аԥеиԥш змоу аинфраструктуратә проектқәа рынагӡара мҩаԥысуеит. Владислав Григори-иԥа Арӡынба ихьӡ зху жәларбжьаратәи ҳҳаирбаӷәаза аусура аиӷьтәреи амасштаб арҭбаареигьы мҩаԥысуеит иахьа. Ацифрақәа аазгар сҭахуп, урҭ аинтерес рыҭахоит ҳәа сгәы иаанагоит. Шықәсыки бжаки рыла ҳҳаиртә баӷәаза 200 нызқьҩык рҟынӡа ауааԥсыра аднакылахьеит. Ари иназыцҵоу хәԥса дууп, Аԥсны Аҳәынҭқарра аекономикатә ҭышәынтәалареи аҿиареи ӷәӷәала иацнаҵоит, избанзар, ҳара зегьы ишаадыруа еиԥш, атуризм иахьа амилаҭтә економика алокомотив акәны иҟоуп.

Иааиԥмырҟьаӡакәа аҭыԥ змоу аихамҩатә еимадара, иара убас иааиԥмырҟьаӡакәа амшынтә еимадара иацырҵоит ҳтәыла аилкаара зҭаху атуристцәа рхыԥхьаӡара.

Ҳәарас иаҭахузеи, аиқәшаҳаҭратә база ӷәӷәа ада аекономикатә еинырра наӡоуп ҳәа алацәажәара ҟалом. Амала, сазааҭгыларц сҭахуп, ҳаҭыр зқәу сколлегацәа, ҳаҭыр зқәу Сергеи Виктор-иԥа, Аԥснытәи жәларбжьаратәи аинвестициатә форум мацара аҟны 35 инареиҳаны аиқәшаҳаҭрақәа шрыбжьарҵаз Аԥсни Урыстәылатәи Афедерациа арегионқәеи хаз игоу аминистррақәеи.

Ҳәарас иаҭахузеи, ари ҳаинырра, ҳаимадарақәа ринтенсивреи рыҩаӡареи ирырбагоуп. Иахьа агәабзиарахьчара аусхк аҟны аинырра аформат дуқәа ахылҿиаауеит. Аԥсны атәылауаа ироуа иалагоит иреиӷьу, ҳаамҭа иақәшәо амедицина ахархәагақәа рыла еиқәыршәоу, Урыстәылатәи Афедерациа агәабзиарахьчара Аминистрреи дареи реинырра аформат ҿыцқәа.

Аҵаратә программақәа русхк аҟны даара аусеицура ӷәӷәа мҩаԥысуеит. Ари аусхк аусзуҩцәа рзы еснагьтәи акурсқәа, атренингқәа, аквалификациа аизырҳара ишьақәгылахьоу практиканы иҟалеит.

Ҳәарас иаҭахузеи, ҳара гәахәарыла иазгәаҳҭар ҳҭахуп иахьа аалыҵ ҿыцқәа, аинвестициатә усхк аҿгьы уахь иналаҵаны, аус шрыдыруло. Урҭ, иахьазы 20 миллиард мааҭ инареиҳаны знапаҿы иаазго иҟалахьо альготатә кредит аҭара апрограммақәа роуп. Ари ҳекономика аҿиаразы ицхыраагӡа дууп. Альготатә кредит аҭара иалнаршоит амилаҭтә економика арцыхцыхра, еиуеиԥшым аусхкқәа рҿы зымҽхак ҭбаау, иамбициатәу, даара ихәарҭоу апроектқәа рынагӡара. Аграртә усхк инаркны аргылара, амаҵзурақәа, атуризм уҳәа русхкқәа рҟынӡа.

Ҳәарас иаҭахузеи, арҭ аусеицурақәа зегьы, ишысҳәаз еиԥш, аиқәшаҳаҭра-зинтә база шьаҭас ирымоуп, ҳара Урыстәылатәи Афедерациа хаз игоу асубиектқәеи апрофильтә министррақәеи аус рыцура иацаҳҵоит.

Сара сазааҭгылар сҭахуп ҳаинырра акрызҵазкуа даҽа хырхарҭакгьы. Ари «амч ҟәымшәышә» ҳәа изышьҭоу аганахьала иааиԥмырҟьаӡакәа, ҽазҵәылхрыла аусеицуроуп.

Ари – Урыстәылатәи Афедерациа, ҳастратегиатә дгылаҩ хада, ҳпартниори ҳареи еицыҟаҳҵо ауп.

Арахь иаҵанакуеит акультура аусхк аҟны зымҽхак ҭбаау аусмҩаԥгатәқәагьы, аҿар рпатриоттә ааӡаразы иахьа алшарақәа реицынагӡара алзыршо еиуеиԥшым аусмҩаԥгатәқәагьы. Урҭ ҳҿар иахьа ахырхарҭа ҿыцқәа рнапахьы раагара, ирласны зҽызыԥсахуа ари адунеи аҿы аиндаҭлара рылшоны рхы абара алзыршо плошьадка ҿыцқәоуп.

Ари, иахьа иҵыхәтәантәиу атехника ажәала еиқәыршәоу, хыԥхьаӡара рацәала аҿар, аенергиа злоу, арҿиаратә уаа здызыԥхьалахьоу апроект «Ҳара ҳаидгылоуп» ауп. Ари, иара убас урыстәылатәи ҳколлегацәеи ҳареи имҩаԥааго еиуеиԥшым аусмҩаԥгатәқәагьы роуп.

Иара убас, Аԥсны Адәныҟатәи аусқәа рминистрра активла иацхрааит апатриоттә кино афестиваль «RT. Адок: Афырхацәа раамҭа» Аԥсны аиҿкаареи амҩаԥгареи. Аԥсны Аҳәынҭқарра иахьаҵанакуа зехьынџьара ари аус ҳахагылеит, ҳәарас иаҭахузеи, уи алҵшәақәа ҳгәы иахәеит. Мышқәак рыла хыԥхьаӡара рацәала Аԥсны атәылауаа, Аԥсны асасцәа арратә операциа ҷыда ахьымҩаԥысуа аҭыԥ аҟынтәи зегь реиҳа ииашоу, хаҭала аинформациа назго арҭ афильмқәа ирыхәаԥшит. Ииашаны ишышәҳәаз еиԥш, Аԥсны ари аус аҟны даара иактиву апозициа ааннакылоит, хатәгәаԥхарала еибашьуагьы, ҳволонтиорцәагьы, агуманитартә цхыраарагьы активла аҵакыра ҿыцқәа рахь ицоит.

Убри аҟнытә Аԥсны, иуҳәар ҟалоит, ажәала акәымкәа, аус аҿы адгыларатәи аиҩызаратәи уалԥшьа иазиашоуп ҳәа.

Ҳәарада, ҳара ҷыдала иазгәаҳҭоит ҳтәылақәа рыдәныҟаполитикатә усҳәарҭақәа реинырра. Урыстәыла Адәныҟатәи аусқәа рминистрра ацхыраарала ҳадәныҟаполитикатә усура ацәаара ҿыцқәа аанахәоит. Ҳара анҭыҵ активра ааҳарԥшуеит, уи аан лассы-лассы Урыстәылатәи Афедерациа Адәныҟатәи аусқәа рминистрра аппарат Хада аконсультациатә, атехникатә, егьырҭ адгыларақәа ҳхы иаҳархәоит, уи азы даара иҭабуп ҳәа шәаҳҳәоит хаҭала шәара, аминистрра егьырҭ анапхгаҩцәа, иара убас аминистрра апрофильтә департаментқәа.

Иара убас, адунеи иарбан регионзаалак аҿы ҳадәныҟаполитикатә ҽазышәарақәа рынагӡаразы иааиԥмырҟьаӡакәа ганрацәала адгылара ҳарҭоит Урыстәылатәи Афедерациа аҳәаанырцәтәи аусҳәарҭақәа рхаҭарнакцәа. Урҭ рҟынтәи еснагь иҳауеит акрызҵазкуа, акомпетенциа ҳарак змоу ацхыраара.

Ҳара иахьа, Урыстәылатәи Афедерациа Адәныҟатәи аусқәа рминистрра ақәшаҳаҭрала апрофильтә департаментқәеи ҳареи ҳабжьара ишьақәҳаргылеит активлатәи аконсультациатә усура.

Регионк ма даҽа регионк аҿы ҳактивра аетапқәа зегьы рыламҭалаз Урыстәыла Адәныҟатәи аусқәа рминистрра апрофильтә департаментқәа рҟынтәи ҳколлегацәа рҟынтәи даара акрызҵазкуа, иаҭаху, ззанааҭдырра ҳаракыла еиҿкаау ацхыраара ҳауеит.