63-тәи Дамасктәи жәларбжьаратәи аџьармыкьа алахәхара аҳәаақәа ирҭагӡаны ацәыргақәҵатә комплекс аконцерттә плошьадкаҿы аԥсуа артистцәеи Шьамтәылатәи Арабтә Республика аԥсуа-адыга диаспора ахаҭарнакцәеи реицықәгылара мҩаԥысит.
Ақәгылара иаԥхьанеиуан аицҽазыҟаҵара. Мчыбжьык иназынаԥшуа артистцәа иааиԥмырҟьаӡакәа аҽазыҟаҵарақәа мҩаԥыргон, иара убас апрофессионалтә ԥышәа еимырдон.
Ахәаԥшцәа ирыдгалан игәылҭәаау аконцерттә программа, уахь иаҵанакуан аԥсуеи адыгеи жәларқәа шәышықәсалатәи ркультура-ҭоурыхтә ҭынха беиа аазырԥшуа итрадициатәу амузыкатәи ахореографиатәи рҿиамҭақәа.
Ҳаҭыр зқәу сасцәаны аусмҩаԥгатә иаҭааит Адәныҟатәи аусқәа рминистр Олег Барцыц зхадараҿы дыҟоу Аԥсны Аҳәынҭқарра аделегациа, Шьамтәылатәи Арабтә Республика аҳәынҭқарратә усбарҭақәа рхаҭарнакцәа, Дамаск аккредитациа змоу адипломатиатә миссиақәа рнапхгаҩцәеи русзуҩцәеи, аԥсуа-адыга диаспора ахаҭарнакцәа, иара убас 63-тәи Дамасктәи жәларбжьаратәи аџьармыкьа алахәылацәеи асасцәеи.
