Аԥсны Адәныҟатәи аусқәа рминистр Олег Барцыц Боливариантәи Ареспублика Венесуела иҟоу Аԥсны Аҳәынҭқарра аҷыдалкаатәз змоу ацҳаражәҳәаҩ Заур Ӷәаџьаа имшира идиныҳәалеит.
Адныҳәалараҿы иазгәаҭоуп:
"Боливариантәи Ареспублика Венесуела иҟоу аҷыдалкаатә зинмчы змоу Аԥсны ацҳаражәҳәаҩ имаҵураҭыԥ аҿы шәара инашәыгӡо шәусура аԥсны-венесуелатәи аиҩызареи, апартниорреи, еицыфеидоу аусеицуреи реизыҟазаашьақәа рыҿиараҿы акрызҵазкуа ароль нанагӡоит. Ҳара ахә ҳаракны иаҳшьоит Латинтәи Америка атәылақәа рҟныы Аԥсны Аҳәынҭқарра амилаҭтә интересқәа рыхьчара аус аҿы хаҭалатәи шәлагала.
Агәра ганы сыҟоуп шәхықәкынагӡареи, шәдырра ҷыдақәеи, ԥхьаҟатәи аԥеиԥш азгәаҭаны аконструктивтә ӡбамҭақәа рыдкылареи аринахысгьы ҳҳәынҭқарра аизҳазыӷьаразы хра злоу аусураҿ иӷәӷәоу уасхырны ишыҟало».
Олег Барцыц Заур Ӷәаџьаа изеиӷьеишьеит агәабзиара, аманшәалара, ҳажәлар реизҳазыӷьаразы адипломатиатә маҵзураҿы ԥхьаҟатәи ақәҿиарақәа.