Нанҳәа 8-9 рзы Ареспублика Никарагуа аҳҭнықалақь Манагуа имҩаԥысит 40 инареиҳаны атәылақәа рхаҭарнакцәа еидызкылаз итрадициатәу есышықәсатәи аԥхынтәи акультура-гастрономиатә фестиваль.

Аԥсны Аҳәынҭқарра аусмҩаԥгатә аҿы иӡырнагеит Ареспублика Никарагуа иҟоу Аԥсны Аҳәынҭқарра Ацҳаражәҳәарҭа.

Аԥсны Аҳәынҭқарра астенд аҿы афестиваль асасцәа ирылшон ҳтәыла аҭоурыхи, агеографиеи, акультуратә ҭынхеи рбара, иара убас аԥсуа чыс атрадициатә аалыҵқәа – ашә, аџьыка, ауаткарш, амилаҭтә гәырхаага – акалмышь ргьама абара.

Аԥсны астенд аинтерес ду рызцәырнагеит афестиваль асасцәеи аҭааҩцәеи, иара убас Ареспублика Никарагуа аккредитациа змоу адипломатиатә корпус ахаҭарнакцәеи. Иара убасгьы иӡырган Аԥсны Абанк абанкнотақәеи итрадициатәу аԥсуа напҟазара аҿырԥштәқәеи.

Афестиваль хыркәшахеит адунеи ажәларқәа ртрадициатә маҭәа арбарала. Аԥсны Аҳәынҭқарра Ацҳаражәҳәарҭа иӡырнагеит итрадициатәу ахацәеи аҳәсеи рмилаҭтә маҭәа аҿырԥштәқәа.

Ас еиԥш аусмҩаԥгатәқәа рылахәхара Аԥсны Аҳәынҭқарра акультуреи атрадициақәеи раларҵәара, агуманитартә еимадарақәа рырҭбаара, еиуеиԥшым атәылақәа рхаҭарнакцәеи ҳареи ҳаиҩызаратә еимадарақәа рырӷәӷәара иацхраауеит.